جهازك صاير يعلق بزياده + تبي تغير الهارد دسك + تبي تفرمت جهازك = إدخل هينا

emperor of love

عضو متألق
بسم آلله الرحمن الرحيم

سبحـآنك آللهم لاعلم لنـا إلآ مـاعلمتنـا
آللهم علمنـا ماينفعنـا وإنفعنـا بمـا علمتنـا

السلام عليكم ورحمة الله وبركاته

إن شاء الله بالموضوع هذا راح أشرح كيف تغير الهارد دسك لـ جهـاز MacBook Pro
وتقريبا الطريقه هذي نفسهـا بجميع أجهزة الماك
وإذا فيه أحد عنده أي سؤال عن الأجهزه الثانيه لايتردد .. وإن شاء رآح أسـآعده بـاللي أقدر عليه

والخطوه الثانيه من الموضوع هذا بتتكلم عن طريقة عمل فورمات للجهاز ( جميع الأجهزه نفس الطريقه ) وتثبيت النظام .. فـ الموضوع هذا راح ينفع اللي يبون يغيرون الهارد دسك .. وبرضوا اللي يبي يسوي فرمته للجهاز


قبل ما أبدى الموضوع بقولكم ليه غيرت الهارد دسك ..

قبل فتره صار الجهاز يعلق معي ويطول وهو معلق .. وأضطر أطفيه من زر البور .. واسمترت معي المشكله هذي فتره .. المهم سويت له فورمات .. يزين يوم ويخرب اليوم الثاني .. سويت له فورمات ثلاث مرات في اسبوعين .. لأني كنت أتوقع إنه من أحد البرامج .. بعدين سويت له فورمات ولا ثبت عليه أي برنـامج وبرضو واجهتني مشكلة التعليق ماراحت .. فـ عرفت إن المشكله من الهارد وير .. ومشكلة التعليق المزمنه اللي مثل كذا غالبا ماتكون من الهارد دسك أو من الرمات.. وفي نهاية الموضوع إن شاء الله راح أتكلم عن أسباب التعليق !

وطبعا قبل ماتجيني فكرة إني أغيره قلت خلني أوديه للمحلات الخوارافيه آللي عندنـا .. المهم دخلت على أحد المحلات ..> قلوبال مدري اي ستور شي زي كذا
المهم يوم دخلت له وقلت له جهازي يعلق كثير .. وفرمته وباقي التعليق .. قالي أمممممم جيب الجهاز حقك نفحصه عندنا وياخذ 24 ساعه ويكلف 100 ريال .. أنـا قمت أنـاظره كذا O‪.‬o
24 ساعه قلت معليش يمكن يكون عندك ضغط لكن 100 ريال ليه O‪.‬o
عرفت إنهم نصابين وماعندهم إلا الضعوي .. وهمهم نهب العالم اللي مايدرون وش السالفه
 

emperor of love

عضو متألق
والحين بسم الله نبدأ نشوف كيف نغير الهارد دسك

الخطوه الأولى: تغيير الهارد دسك


في البدايه هذي العده اللي نحتاجها اللاب + مجموعة مفكات صغيره لأن بنحتاج نوع عشان نفك مسامير الهارد دسك + الهارد دسك ( ويفضل Westren Digital Scorpio Blue
لأنه سريع وأقل حراره من البلاك



نقلب الجهاز ونفك المسامير حقته




وبعد مانفكها يفضل إنك ترتبها على شكل الجهاز عشان ماتتخربط لأن فيه ثلاث مسامير طويله والباقيات نفس الشي




هذا الجهاز بعد مافكيت مساميره واضحه الصعرورتين اللي فيه




نظره على الجهاز من الداخل




نفك المسامرين اللي مثبتين الهاردسك عشان مايهتز .. والمسمارين موضحين بالصوره اللي تحت




وهينا بعد مافكينا المسمارين




والحين نفك السلك اللي بالهارد دسك




وهذا هو السلك بعد مافكيته



والحين نفك المسامير اللي بجوانب الهارد دسك ( اللي تثبت الهارد دسك ) وشكل المسامير هذي يشبه النجمه السداسيه




وهذي هي المسامير




وهذا هو الهاردسك الجديد




نربط فيه المسامير الموجوده بالصوره اللي فوق .. وبعدين نشبك فيه السلك مثل ماهو موضح تحت




الصوره اللي تحت توضح المكان اللي نحط فيه السمامير المثبته بالهارد دسك




والحين نحط الهارد دسك مكانه ونركب اللي يثبته ونربط المسامير




وتحت صورة الهارد دسك بعد ماركبته





والحين نركب الغطا الخلفي ونربط المسامير ونرجع الجهاز مثل ماكان وبكذا نكون خلصنا من الخطوه الأولى
 

emperor of love

عضو متألق
الخطوه الثانيه : تثبيت النظام

اللي نحتاجه هو السي دي اللي جاء مع الجهاز .. طبعا سي دي النظام ماهو حق الأبليكيشن مثل ماهو موضح بالصوره تحت




والحين نشبك الجهاز بالشاحن ونشغله .. ونضغط على زر alt
ونبقى معلقين عليه



بعدين بتطلع لنـا صورة السي دي مثل الصوره اللي تحت




نضغط على علامة السي دي وبيقعد وبيجينا مثل ماهو موضح تحت .. طبعا احتمال ياخذ وقتل الجهاز وهو على الوضع هذا




نختار اللغه حقت الجهاز ..طبعا مافي عربي خلها ع الانجلش




بيقعد الجهاز يستعد لتنصيب النظام .. واحتمال ياخذ وقت .. اصبر عليه




إذا خلص من الاستعداد بتجينا نافذه اسمها Install Mac OS X
قبل ماتضغط Continue ..
شوف فوق تلقى Utilities
نضغط عليها ونختار Disk Utility



1 ‫-‬ نضغط على الهارد دسك
2‫-‬ بعدين نضغط على Partition

URL=http://www.4shared.com/photo/BH4w4L6w/24_online.html]
[/URL]

1- نضغط على علامة الـ‪+
2- سم الهارد دسك إذا حاب تسميه
3- بعدين نضغط على Apply



الحين الهارد جالس يقسم .. طبعا تقدر تقسمه أكثر من قسب بإنك تعيد نفس الخطوه السابقه



بعدين نقفل الـ Disk Utility
ونرجع لنافذة Install Mac OS X
ونضغط Continue




هذي الاتفاقيه .. نضغط Continue



هينا يقولك اختر المكان اللي تبي تثبت فيه النظام
نضغط على علامة الهارد دسك مثل ماهو موضح تحت




والحين بيقعد الجهاز يثبت النظام .. خله لين يخلص




هينا يبارك لك ويقول لك إذا كنت ماسح الهارد دسك او مركب جديد وتبي تنزل البرامج اللي هي iPhoto، iMovie إلخ .. حط السي دي الثاني .. طبعا ماعليكم منها تقدرون تسوونها بعدين .. واذا ماكنتو بحاجة البرامج هذي ماهو لازم تثبتونها .. المهم نضغط على Continue




والحين نسوي Restart للجهاز




بعدي مايشتغل الجهاز .. بيبدأ خطوات التسجيل ..أول شي إختر الدوله حقتك .. في البدايه ماراح تطلع كل الدول إلا إذا حطينا علامة صح على Show all




هينا بيقول لك إذا عندك جهاز ماك ثاني تقدر تنقل منها الملفات .. او إذا عندك بارتشن ثاني على نفس الجهاز وتبي تنقل منه الملفات او من التايم مشين .. اختر اللي يريحك .. بس عن نفسي أختار Do not transfer your my information now
وانا بعدين انقلها بنفسي ..



هينا نختار لغة الكيبورد .. في البداية ماراح نقدر نختار الا لغة وحده .. ولكن نقدر نضيف أي لغة ثانيه بعد مانشغل الجهاز من الـ System Preferences‪ => Language & Text => Input Sources‬
‪بعدين نحط علآمة صح على اللغه اللي نبي نضيفها .. مثل اللغه العربيه‬



‪هينا نختار الشبكه اللاسلكيه حقت البيت .. واذا ماتبي اضغط ‬
Continue‬



والحين إذا عندك Apple ID
اكتبه وإذا ماعندك أو ماتبي تكتب حقك أضغط Continue




هينا معلومات التسجيل .. إذا تبي تحط معلوماتك حطها .. واذا ماتبي أضغط Continue وبتطلع لك نافذه ثانيه تقول لك إنك ماكتبت بعض المعلومات تجاهلها و أضغط Continue



هينا اذا تبي تحط الباسوورد حق الجهاز أو اسم الجهاز .. واسم ملف الـ Home



والحين اختار صوره للحساب حقك




أختر المنطقه حقتك




شوكرن وبكذا خلصنا اضغط على Go



والحمدددددد للللله بكذا نكون خلصنا .. والجهاز الحمد لله مثل أول ماشريته وأحسن



وبكذآ نكون خلصنـا من تثبيت النظام
 

emperor of love

عضو متألق
والحين راح أقولكم اللي أعرفه عن أسباب تعليق اجهزة الماك .. واذا كنت غلطان أتمنى أحد يصحح غلطي .. وإذا أحد عنده إضافه أو تجربه سابقه مع التعليق ياليت يقولها ويقول كيف تخلص من المشكله هذي عشان نستفيد كلنا … ومانحتاج لأي أحد يصلح أجهزتنـا ويستغل مافي جيوبنا ونتعلم كيف نصلح أجهزتنا بنفسنا..

السبب الأول أحيانا يكون من بعض البرامج اللي حجمها كبير وتستهلك من الذاكره العشوائيه أو البرامج اللي تتعارض مع برامج أخرى .. أو البرامج المعطوبه
في هذي الحالة يفضل إنك تفرمت الجهاز وتسوي Erase للهارد دسك بعد ماتحفظ ملفاتك في هارد دسك خارجي
ويفضل 7‪-‬Pass Erase of Deleted Files
وبعدها تثبت النظام

السبب الثاني يكون من الهارد دسك .. ومثل ما أنتم عارفين اللاب توب ننقلها معنا كثير فـ يتعرض الجهاز لإهتزازات وأحيانا يصطدم الجهاز بشي مثل الباب الجدار أو يطيح الجهاز من فوق السرير مثلا وهو يشتغل .. فهذي أحيانا تسبب عطل في الهارد دسك
وإذا كان الهارد دسك خربان مره بتطلع لك علامة ملف وعليه علامة استفهام أول ماتشغل الجهاز .. في الحاله هذي لازم تغير الهارد دسك

السبب الثالث والاخير .. واللي أتوقع قليل حدوثه اللي هو الرامات .. وهذي تغير الرامات .. وبرضوا شغلتها سهله اللي حاب يغيرها يعلمني .. ويبشر بطيب الخاطر


والحمد لله الذي بنعمته تتم الصالحات
أتمنى من الله إنه يكون وفقني في إيصال المعلومة وافيه وكافيه .. وأي سؤال أو إستفسار أنـا حاضر .. وآللي عنده أي نقد أو ملاحظه أرحب فيها بسعة صدر لأجل يستفيد الجميع

وأحلل كل من ينقل الموضوع هذا بدون مايغير فيه شي إلا اذا كانت عنده اضافه تنفع .. بل والله إني أتمنى إني اشوف الموضوع منقول بكل مكان
 

emperor of love

عضو متألق
معلومه أخيره هي أنا آللي كتبت الموضوع و عضويتي في المنتديات الأخرى هي SuPer_7mOoooOdi
 

ADz1989

عضوية ذهبية
يعطيك الف عافية موضوع الجدا مهم

اقدرلك تعبك والله وتستاهل احسن تقييم !!

ربي يوفقك ان شاء الله
 

ماك وبس

عضوية ذهبية
مشكور على الموضوع المهم

بس انا عندي سؤال مطير عقلي

انا قد سويت فرمته ونفس الطريقه الي انت قلت عليها

وغير كذا سويت ايرس مو للهارد بس فيه شي ثاني يطلع بالخيارات الي 7‪-‬Pass Erase of Deleted Files وغيرها الثانيه مدري شسمها

كلهم سويت لهم فرمته وانتظرت وقت طويل لاني استغربت يوم فرمت الجهاز العادي مااخذ الا ثواني

المهم عقب ما فرمت جيت افتح الجهاز وحملت السكايب ولما فتحت محادثه انكبت علي كلللللل المحادثه القديمه جتني ورى بعض رن <-- رن يعني صوت المحادثات لما انكتبت بسرعة البرق خخخ

المهم يعني انه حافظها طيب كيف حافظها وانا مفرمت جهازي كل ابوه ...؟؟ <-- بيصيح

رحت وفرمت مره ثانيه ونفس المشكله وبدين قطعت الامل ع اني من قوة الوسوسه ومع اني حافظ الطريقه لكن رحت وجبت جهاز ثاني وطبقت نفس الشرح

ممكن تقولي المشكله من وين :( ليه محادثات السكايب ما انحذفت انا ما تهمني لكن اخاف ان البلا فجهازي ولا المحادثات ان شاء الله عمرها ما انحذفت بس ابعرف ليه
 
يعطيك ألف ألف ألف ألف ألف عافية على الموضوع المميز من جد الله لا يحرمنا من إبداعاتك يا بطل جد أستفدت من هذا الموضوع ...

تحياتي لك يا بطل والله يوفقك ويعطيك العافية وإلى الأمام
 

U.N.O

عضو
كبيييييير يآ محمد ..
آلششرح بططل وتمآم ومن آحسن مآيكون ،
يعطيك آلعآفية مآقصرت ، عسآك ع آلقوه ^^
 

emperor of love

عضو متألق
ADz1989
يعطيك الف عافية موضوع الجدا مهم

اقدرلك تعبك والله وتستاهل احسن تقييم !!

ربي يوفقك ان شاء الله
ربي يعافيك آستـاذي
أجمعين يـارب

ماك وبس
مشكووووووور على الموضوع المهم

بس انا عندي سؤال مطير عقلي

انا قد سويت فرمته ونفس الطريقه الي انت قلت عليها

وغير كذا سويت ايرس مو للهارد بس فيه شي ثاني يطلع بالخيارات الي 7‪-‬Pass Erase of Deleted Files وغيرها الثانيه مدري شسمها

كلهم سويت لهم فرمته وانتظرت وقت طويييييييل لاني استغربت يوم فرمت الجهاز العادي مااخذ الا ثواني

المهم عقب ما فرمت جيت افتح الجهاز وحملت السكايب ولما فتحت محادثه انكبت علي كلللللل المحادثه القديمه جتني ورى بعض رررررررررن <-- رررن يعني صوت المحادثات لما انكتبت بسرعة البرق خخخ

المهم يعني انه حافظها طيب كيييييييف حافظها وانا مفرمت جهازي كل ابوه ...؟؟ <-- بيصيح

رحت وفرمت مره ثانيه ونفس المشكله وبدين قطعت الامل ع اني من قوة الوسوسه ومع اني حافظ الطريقه لكن رحت وجبت جهاز ثاني وطبقت نفسسسس الشرح

ممكن تقولي المشكله من وين :( ليه محادثات السكايب ما انحذفت انا ما تهمني لكن اخاف ان البلا فجهازي ولا المحادثات ان شاء الله عمرها ما انحذفت بس ابعرف ليه
ماعندي علم أكيد أستاذي .. لكن يمكن وماني متأكد إن المحادثات تنحفظ بسيرفرهم .. لان اذا سويت Erase للهارد دسك كل شي ينمسح.. وبالنسبه للوقت اللي ياخذه عشان يسوي Erase 7 اكيد اطول و Erase 36 اطول من 7 وزي كذا يعني

روح القمر
يعطيك ألف ألف ألف ألف ألف عاااااااااااااافية على الموضوع المميييييييييييييييز من جد الله لا يحرمنا من إبداعاتك يا بطل جد أستفدت من هذا الموضوع ...

تحياتي لك يا بطل والله يوفقك ويعطيك العافية وإلى الأمام
ربي يعافيك ويخليك لعين ترجيك .. ولا يحرمنا من طلتك .. وهذا اللي كنت أتمنـاه إنكم تستفيدون منه .. وبنفس الوقت تنشرونه عشان اللي يحتاجه بيلقاه


U.N.O
كبيييييير يآ محمد ..
آلششرح بططل وتمآم ومن آحسن مآيكون ،
يعطيك آلعآفية مآقصرت ، عسآك ع آلقوه ^^
مرورك الأبطل .. وربي يعافيك ويقويك
 

ماك وبس

عضوية ذهبية
ADz1989


ماك وبس


ماعندي علم أكيد أستاذي .. لكن يمكن وماني متأكد إن المحادثات تنحفظ بسيرفرهم .. لان اذا سويت Erase للهارد دسك كل شي ينمسح.. وبالنسبه للوقت اللي ياخذه عشان يسوي Erase 7 اكيد اطول و Erase 36 اطول من 7 وزي كذا يعني

طيب يالغلا الحين ال Erase 7 والثانيات الزيرو ومدري ايش وشهم ذولي وليه يطولون
 

عبدالله1

عضو نشط
اخوي انا بسوي فورمات للجهاز حقي بس متلخبط اشوف ناس يفرمتون الهاردسك الاصلي وناس يفرمتون اللي مكتوب عليه ماكنتوش اتش دي؟؟! وش الفرق؟؟

ومن وين احذف الملفات على الزيرو في الفورمات؟
 
emperor of love
شرح وافي الله يعطيك العافيه..
 

ADz1989

عضوية ذهبية
طيب يالغلا الحين ال Erase 7 والثانيات الزيرو ومدري ايش وشهم ذولي وليه يطولون
شوف حبيبي :
الEarase 0 pass هذا يمسح الدسك مرة وحدة ويعطيك اقل حماية انه لو واحد شغل برنامج الرستور اللي تطلع الملفات المحذوفة ممكن يجيبها
الـEarase 7 pass هذا يقعد (٧ مرات اطول من ال زيرو) ويكتب على الهارد ٧ مرات
ال Earase 35 Pass يقعد (٣٥ يقعد وقت مررررررررة طويل) لكن هذا الحماية للي عندهم وسواس P:
 

iMalqasem

عضوية ذهبية
مشكور علي الجهد الرائع والله يعطيك العافيه
 

ahmedosa

عضوية ذهبية
موضوعك ممتاز جدا وشرحك وافي جدا جدا جدا

عندي بس اضافتين

الاولي: بما ان موضوعك اصلا عن زيادة السرعة ورفع اداء الجهاز فاعتقد لو انك استخدمت Seagate Momentus XT بيكون افضل من Western Digital لان تقنيتهم ممتازة، الله يكرمه اخي ابراهيم (iStyle) على اقتراحه لهذا النوع

الثاني: ممكن من البداية تعمل باك اب بالتايم ماشين، وريستور على طول عالهارد ديسك الجديد بدون حتى تثبيت للنظام اولا، اعتقد هذي الطريقة اسرع واريح للذي يريد تغيير الهارد ديسك

ومشكور جدا على مجهودك

تقبل مروري،،،
 

emperor of love

عضو متألق
عبدالله1
اخوي انا بسوي فورمات للجهاز حقي بس متلخبط اشوف ناس يفرمتون الهاردسك الاصلي وناس يفرمتون اللي مكتوب عليه ماكنتوش اتش دي؟؟! وش الفرق؟؟

ومن وين احذف الملفات على الزيرو في الفورمات؟
ممكن الهارد دسك يكون مقسم اكثر من قسم فـ بعضهم يفرمت القسم اللي فيه النظام ويخلي القسم اللي فيه المعلومات حقته .. والبعض يفرمت الهارد دسك كااااامل .. وبالنسبة اذا تبي تحذف كل شي لازم تسوي فورمات كامل للهارد دسك .. إذا رحت للـ Disk Utilities راح تحصل صورة هارد دسك على اليسار وهو الاساس.. وايضا راح تحصل صوره ثانيه تحته وهذا القسم حق الهارد دسك .. فمثلا اذا لقيت صورة هارد دسك وحده ( تحصلها مايله لليمين تحت صورة الهارد دسك الاساسيه ) فهذا يعني ان الهارد دسك مافيه الا قسم واحد .. وتقدر تقسمه اقسام ثانيه على كيفك ..

طبعا أنت تبي تسوي فورمات كامل فـ لازم انك تخلي الجهاز يقلع من السي دي وبعدين بالصوره الثامنه من الخطوه الثانيه .. بدال ما تضغط على Partition تضغط على Erase وتحدد نوع الـ Erase مثل ماتفضل الأخ ADz1989 في الرد دقم 14 وشرح انواع الـ Erase ( طبعا تضغط على الصوره الاساسيه للهارد دسك لانك تبي تمسح كل شي .. اما اذا كنت تبي تمسح قسم من الاقسام .. فـ اضغط على القسم اللي تبي تفرمته )

أرجو إن تكون المعلومه وصلت .. واذا فيه شي مافهمته أو إذا كان سؤالك عن شي وأنا جاوبت عن شي ثاني .. ياليت تعلمني



أبوعمرابيا
emperor of love
شرح وافي الله يعطيك العافيه..
حياك الله .. وربي يعافيك اخوي

ADz1989
يعطيك العافيه على الشرح


iMalqasem
مشكووووووور علي الجهد الرائع والله يعطيك العافيه
العفو أخوي .. وربي يعافيك ويخليك



ahmedosa
موضوعك ممتاااااااز جدا وشرحك وافي جدا جدا جدا

عندي بس اضافتين

الاولي: بما ان موضوعك اصلا عن زيادة السرعة ورفع اداء الجهاز فاعتقد لو انك استخدمت Seagate Momentus XT بيكون افضل من Western Digital لان تقنيتهم ممتازة، الله يكرمه اخي ابراهيم (iStyle) على اقتراحه لهذا النوع

الثاني: ممكن من البداية تعمل باك اب بالتايم ماشين، وريستور على طول عالهارد ديسك الجديد بدون حتى تثبيت للنظام اولا، اعتقد هذي الطريقة اسرع واريح للذي يريد تغيير الهارد ديسك

ومشكور جدا على مجهودك

تقبل مروري،،،
ربي يسلمك ..

أولاً: أخوي أنت تتكلم عن هارد دسك الـ SSD .. صحيح كلامك إنه سريع حدآ ومعروف وأفضل من الـ HDD .. لكن بنفس الوقت سعره غالي جدا بالنسبه لي.. وأيضا الفروقات بينهم ممكن استغني عنها لأن السرعه اللي بينهم بالثواني وأنا كمستخدم عادي ماتفرق معي الثواني هذي ..

ثانياً: كلامك صحيح .. وممكن أيضا أعملها من الـ Disk Utilities بحيث إني أشبك الهارد دسك الجديد كـ هارد دسك خارجي للكمبيوتر وأسوي Restore .. وبكذا أنقل كل شي وأركب الهارد الجديد في الجهاز ..
بس الهارد حقي خرب وصار يعلق كثير .. بحيث إني كل ما أفتح شي ياخذ وقت وأحيانا مايفتح .. فـ سويت اللي أنـا سويته .. ومنها شرحت كيف تفرمت الجهاز .. يعني ضربت عصفورين بحجر

العفو ومرورك فوق الراس .. ولا عدمنا هالطله
 

ahmedosa

عضوية ذهبية
الـ Momentus XT ما هو SSD بس جزء منه SSD لكن الهارد ديسك نفسه 7200rpm عادي

وسعره حوالي 100$ يعني فرق السعر ماهو كبير، والفرق بينه وبين الـ 5400rpm حوالي ٣٧ ثانية في تشغيل النظام، بيكون اداؤه اعلى كمان في عمل النظام

يومك سعيد ان شاء الله :)،،،
 

ماك وبس

عضوية ذهبية
شوف حبيبي :
الEarase 0 pass هذا يمسح الدسك مرة وحدة ويعطيك اقل حماية انه لو واحد شغل برنامج الرستور اللي تطلع الملفات المحذوفة ممكن يجيبها
الـEarase 7 pass هذا يقعد (٧ مرات اطول من ال زيرو) ويكتب على الهارد ٧ مرات
ال Earase 35 Pass يقعد (٣٥ يقعد وقت مررررررررة طويل) لكن هذا الحماية للي عندهم وسواس P:


مشكور على هالمعلومه الي اول مره ادري عنها

ما قصرت واعذرني غثيتك شوي وفالك التثبيت والاشراف بعد :)

بالتوفيق دوما
 
الأعلى